Ik ansoo

Ik ansoo laboon pey dum tor gaya

aur mai yeh manzar taktaa raha

ankhoon kay dareechay chamak rahe they shan say

ik mehak bhi mulhiqa thi saans say

lab , kushai ko taras rahe they

palkoon pey tehehray badal baras rahe they

ik lamhay ko mai dar gya .....

aur uska hath meri taraf barh gya

tham kay mera hath wo muskura dia

jaise lamhay bhar mai gul ne gulshan mehkaa dia

lafzoon ka intikhaab hi tu uska jamal tha

shayad isi liye uski khamoshi mai ik sawal tha

silsilay khamoshi kay aakhir toot hi gaye

hathoon say hath bhi ....chooth hi gaye

wo uth khara hua janay kay liye

na murh kar kabhi wapis aanay kay liye

mmmmmmmmmmmmmmmmmmmmm

wo tanha mujhe chor gya

ik ansoo laboon pey dum tor gya

aur mai yeh manzar taktaa raha

Saawan

Sunu

ab tu barsaat bhi aanay ko hai

badal bhi ab ansoo bahane ko hai

wo bondoon ka tup se tapakna

wo cheentoon ka chal se chalakna 

mehaz ik raag sa sunane ko hai

wo geeli mitti ki khushbu

wo geelay patoon ka manzar

wo geeli geeli si raahein

goya jidher  bhi jayein

faqat dil-e-weeran ko tarsane ko hein

wo parindoon ka seham kay bethna

wo bachoon ka angan mai chehakna 

ik manzar acha dil kay behlanay ko hai

wo hawa say jhoolay ka hilna

wo aasman o zameen ka milna 

wo muskurahtoon ka khilna

khayal-e-khoobsurat ankhon mai thehar jane ko hai

sunu

khud say itna pyar na karna

kisi ki nazar ka aitbar na karna

ab kay saawan....singhaar na karna

kay weham aur bhi dil mai......satanay ko hein

Chaar Ishaar

     

                           Aisa kya tha jahan mai jo humne kho diya

                           kay khud sakhta dil haste haste bey sakhta ro diya

                     kabhi na bikharta sheraza ulfat ka apni

                     kisay tehrayein kasoor war jab apna hi naseeb so diya

                          khush palkoon ki arh mai hum bhi mehv e hajoom ho gaye

                          huye gosha nasheen tu ashkoon ki maala ko pero diya

                     tu bhi tu dunya kay rangoo say aik rang tha shair(poet)

                    ab tu seham chuki hien kehkishayein bhi is dil ney dard jo diya

                           aisa kya tha jahan mai jo humne kho diya 

Khamoshi

Aalam-e-khamoshi mai bhi laboon pay ilfaaz say kyun hein

yeh dunya waley, dil waloon say itne bey niaz say kyun hein

Subhi kuch tu lutaa diya chand anjaan dharkano kay siwa

Is par bhi zamanay kay tewar is qader naraz say kyun hein

kay kay apni hi kismet ki lakeerein baja laati hien suroor

jo bana dey sham-e-ghazal ko udas tu mehfil mai aise saaz say kyun hien

Yeh dunya wale , dil waloon say itne bey niaz say kyun hien

Dard e Kinnaird

Hasool e Maqsad pey likhi gayi aik farzi kahani

Lahorion kay liye lahore ki neher hi niagara fall aur hawaii beaches hein .mausam khuwa koi bhi ho lahori isi sarak sey safar karne ko tarjeeh detey hein yeh wo nehar hai jo saal mai do (2) maah safayi aur do(2) maah kisi na kisi under pass ki taameer ki wajah se ruki rehti hai magar jashan e baharan , jashan e azadi jaise mokoon pey isay khoob sajaya jata hai , aur is nehar kay dono atraaf ki shahrayein logoon ki tawajoh ka markaz bani rehti hien
            Baat shuru hoti hai ab hum jaise neem samajhdar aur sabit qadam insan say jis key liye yeh shahraayein 12 mahinay tawajoh ka markaz bani rehti hien. parhne waley shayad is cheez ka khayal nahi kar rahe shayad kay yehi neher jail road se bhi ho kay guzarti hai , ab sochne ki baat yeh kay aik nihayat shareef aur kabil aadmi ka jail se kya taluq tu janab mukamal naam jail road hai hum jaisoon ka doosra ghar second home , pehla bhi kahein tu galat na hoga .kyun kay ghar tu hum sirf sonay jate they baqi wakt tu jail road pe hi guzarta tha.jahan uske footpath humari sair gah they wahin ispe banay bus stop humari khawab gah,bhai hum tu kehte hein k sooraj dhalne aur talooh hone ka jo manzar jail road se nazar aata hai wo sahil e samunder aur baraf se liptay paharoon say bhi nahi aata , goya asli lahore humare liye wohi tha jo mozang kay qurtaba chowk say shuru hota hua bal khaati sarak k zariye sher pao bridge tak jata hai.
           Buhat sochne aur samajhne k baad hum awara o naakra union ney isko United States of Jail road ka naam dia, waise tu yahan choti moti kaafi states hein lekin bari states mai APWA , LAHORE , KINNAIRD sir e fehrist  hein ,Lahore aur apwa jesi states ko humne buhat pasmaanda paaya aur uska irada turk karte huye KINNAIRD  mai deray daalne ki thaan li 
        Ibtidayi taleem aur Intermediate kay baad kaafi khud aitmadi aa gyi thi , tu waldeen ko yeh kehte huye zara sharam nahi ayi kay graduation tu hum kinnaird college say hi kareinge.ghar mai sab say chota aur ladla honey ka trump card tu humare hath mai tha hi tu lagay zid karne is maqsad kay liye do , char din ki bhook haartaal say bhi daraigh na kiya maa tu maa hoti hai , lakht e jigger ko bhooka dekh kay kalejay ko hath para tu bol hi parein tu yoon mehsoos hua jaise umeed kay ballot box mai chunn(sound) kar kay aik winning vote aa gira ho,walid sahab kay dala-ill (Rationale/Justification) bhi unkay iraday ki terha pukhta thay kay Begum kinnaird khawateen ka college hai wahan daakhlay kay liye yaa tu jins ki tabdeeli zaroori hai ya koi khas qarar daad manzoor karwani pare gi akwaam-e-mutahida say khair dono kaam hi na mumkin kay tu humare liye.Jis maa ka jawan jahan beta bhooka pyasa ho wo kaise chain se jee paati aakhir kaar walid sahab ko apne hathyaar daalne hi pare aur lagay apne asar rasookh larane kay shayad daakhla karwa sakein , Ulaad aur Bewi ki mohabat mai humne unhe mufti bantey bhi dekha jab humne hi fatway kay mutabik unho ney rishwat ko halal qarar de diya par na mumkin ko mumkin banaye kon ? aakhir kar tamam tar kaawishoon kay bawajood kuch hasil na aya aur aur wakt ki chaki mai mardana colleges ki taareekhein bhi guzar gayein
                Mard hein zuban kay pakay o paband hein tu maqsad kiun kar badal letey .maqsad abhi bhi kinnaird hi tha , ander na jaa sakay tu kya hua ? bahir kharay honay se hume kon mayi ka laal rok sakta tha ...ma siwaye bawardi musalah afraad kay (police) itna taawun tu khair humara unsay  banta hi hai ba-hesiyat mauziz shehri .Tu janab usi kinnaird college kay bahir deray daal liye aur us manshoor  pay amal daramad shuru  kar dia jo humne is yakeen kay sath banaya tha kay humare walid bari top cheez hein chutki bajate hi daakhla karwa deinge lekin iska andaza baad mai hua kay aaloo piyaz kay bhao kam karwane aur betay ko khawateen kay college mai daakhla dilwane mai buhat farak hai 
              Ab kya ...hum jo banay Intermediate sirapa e ghazal tu har khatoon hume dekh k shairi kerne lagi , hafiza kamzor na hota tu shayad sab yaad kar letay par jinpe takiya tha unka kalaam kuch yoon tha
tera naam janti hoon
tera kaam janti hoon
teri zindagi ki subha
teri sham janti hoon
mai yeh bhi janti hoon tera paighaam kya hai
kaka , tujhe phaye lagane kay harbay tamam janti hoon
"boli jao saanu ki " hum tu bhai sir pey kafan baandh kay ghar se nikley they aur wo mujahid hi kya jo jaam e shahadat nosh farmaye bina hi jihaad chor day.hume tu har haal mai apni aur tamam awara o nakara mardoon ki union ki baqa o salamti kay liye jihaad kerna tha .Tu bus morchay sambhaal kay beth gaye , aslaah kay taur pey aankhon pe chashma hath mai qalam muh mai ciggarette aur jaib mai saada auraak (papers/chits) maujood they.Din raat , raat din bus jihaad hota raha lekin kisi ka bhi dil fateh karne mai kaamyaab na ho sakay aur isi dooran do(2) qeemti saal guzar gaye "nayi tey naa sahi" ki policy pe amal karte huye humne hathyaar daal diye aur kuch parhne , kuch karne ki thaani.
             Apni man mani ka nateeja yeh nikla kay humare sponsors bhi bhag gaye , jee haan ! humare waldeen aik phooti kori bhi dene ko tayar naa they tu khair baat wohi kay khud aitmaad tu hum they hi humne apne kharchay khud uthane ka faisla kia , awara o nakara union kay sadar aur doosre memberaan say maazrat kay baad apna isteefa rakhte huye golden hand shake ka mutaalba kia , apni wafadaari ka dhaansoo sa saboot dene kay bad itni raqam mil hi gyi kay kisi sarkaari college mai daakhla ho jata baqi kharcha tu hum part time nokari se bhi utha lein aakhir hum se acha hai kon
            Ab jab dobara taleemi silsila shuru kia tu kuch palay hi na paray yoon laga jaise taleem se tu door door tak humara koi rishta nahi , ghar aur union say over confidence ka certificate mila chuka tha tu apna haal kisay sunatey.khair himat tu aakhir karna thi , doosra masla jo dar paish tha wo amdan thi tu janab aik dhoobi si istari karwaya jora pehan kay nikal paray dafatir(offices) ki khaak channe yahan se wahan, wahan se yahan
 jahan kaproon pey salwatein parein wahin jootay bhi ghis gaye matric aur inter ki sanad ko aik file mai rakhay hum dar ba dar thokrein khaatay rahe , majaal jo kisi ney wo file  dekhne ki bhi himat ki ho so kuch arsa yehi maamool raha aur isi asnah  mai fees ada karne ki taareekh aa gayi ghar wale aik lafz sunne ko tayar na they khair marta kya na karta yeh baich wo baich yeh kaarnaama bhi anjaam de hi diya.taleemi muamlaat mai tu humari esi wapsi hui jesi kisi jila watan siyasatdaan ki hoti hai magar afsoos beyrozgaari ka dhaba abhi bhi humare daaman mai laga hua tha .Ab wakt aa chuka tha kay zindagi ka har darwaza band ho chuka tha ma siwaye dar-e-mayoosi , na umeedi kay abhi us mai daakhil honay ko hi they kay qudrat meharban ho gayi aur aik choti moti nokari mil hi gyi , sanjeedgi ab humari ragoon mai dorne lagi thi din mai taleem sham mai nokari yehi humara mamool-e-zindagi tha ,akhir kaar wo din bhi aa hi gaya jab humari file mai matric , inter kay baad graduation ki degree bhi qayaam pazeer ho gayi.
                Saawal yeh tha kay , kyaa yehi mustakbil hai ?? jawab aaya nahi abhi nahi abhi tu shuruwaat hai , nataij  itne ache they kay kisi bhi ache college university mai dakhla ho jata . humari sanjeedi aur lagan ko dekhte huye hume ghar say bhi hamdardi ka vote mil chuka tha , lekin ab tu jaise mushkilaat ka samna kanre kay aadi ho chuke they tu teh yeh paaya kay subha classes leinge aur sham mai apni walid sahab ka unke business mai hath batayeingey waqt ka pahiya(wheel) aisi barq raftari say ghooma kay kay ab kay file mai na sirf masters ki degree bulkay tajuraby kay do(2) patar bhi lag gaye ab zaroorat thi aik interview ki tu jab sab kuch theek ho raha  tha wo bhala kaise ghalat hota tu janab aik kabil-e-fakhar nokari mil gayi aur adjustment mai tu waise hi hume kamal hasil tha tu maamool kuch aisa banaya kay haftay mai daftar se milne wali do (2) chution ko humne zaaya karne ki bajaye walid sahab k business kay liye waqf kar dia.
        Khuda ki laathi be awaz hai yeh tu suna tha yahan tu uski rehmat bhi be awaaz hi sabit hui aur ittefaq say  aik aisi khatoon humari shareek e hayat ban k ayein jinho ne kinnaird college say hi graduation kar rakhi thi tu zindagi ka wo maqsad bhi poora ho gaya , mukhtasiran yeh kay ALLAH ki zaat kay har khushi yar rehmat se nawaaz daala . aaj mere ghar aur daftar kay beech aik lambi sarak ka faasla hai ...je haan ! united states of jail road , dopahar kay khanay kay liye rozana hi ghar jana hota hai aur kinnaird se guzarna parta hai , aaj bhi wahan larkoon ki kaseer taadaad maujood hoti hai, shayad yeh manchalay bhi meri terhan yahan daakhlay ka irada rakhte they , aur na honay pey kharay ehtijaaj kar rahe hien yeh soch kay aksar muskura deta hoon , yeh muskurahat mujhe sharminda tu karti hai par aik sawal khud pey naaz karne pey bhi majboor kar deta hai kay kya yeh bhi apna asal maqsad samajh payeinge ...kya yeh abhi mustakbil sanwaar payeinge ??........
ALLAH TAALAH hum sab ki zindagi ko aasaan banate huye hume naik aur seedhi raah pey chalne ki taufeeq ata farmaye  Ameen
Adeel Ahmed 2009

Sabar Ka Phal

A Story Of  a Innocent Pakistani .....

Dopahar kay saarhay 3 baje ka wakt tha , dopahar ka khana khanay kay baad ki tabiyat ka bojhal pan uske wajood mai apne asraat muratab ker raha tha , bijli hasb-e-maamool nahi thi , bhaadon ka mausam apne zooroon pe tha , samney counter pe rakhe toliye kay rumal ko uthate huye usne kuch der dukaan se bahir kharay honay ka faisla kia .Garmi k sath habs ka silsila b chal raha tha machroon kay kaatay par bazoo khujata hua wo dukaan se bahir aa khara hua tu kuch rahat mili aik becheni ka ehsaas abhi bhi uske ander tha rukmal se chehre se tapakate pasinay ko saaf karte huye usne aasman ki janib dekha tu janood se kaali ghatayein apna safar teh kartien nazar ayein man hi man wo khud ko tasali dene laga
        Paas se guzarte aik shaks ney wakt daryaaft kia aur sath hi hath kay ishare se pani kay glass ka mutaalba kiya.Bawajood iske kay yeh usko nagawaar guzra wo phir bhi dukan kay ander rakhey cooler se pani bharne laga in chand lamhaat mai  ,deewaron aur zameen se nikalne wali tapish ne usay mukamal taur pe bhigo dia pasinay kay katray aik bar phir uski sharyaano se tapak kay uski gardan tak jane lage.pani ka glass wapis lete hue usne aik martaba phir aasman ki janib dekha tu badal apni kaafi safar teh ker chuke they usne aik thandi aah bhari aur bechani kay alam mai idher uder dekhne laga dar asal wo khud bhi nahi janta tha wo kya chahta hai achanak uski nazar zameen pey giray  aik akhbar par pari .yeh akhbar ka filmi safha tha kuch der chat pati khabrein parh kay wo zer e lub muskuraya aur phir uski akhbar ko teh laga ka jhalnay laga ,hawa jab uske chehre se takrayi tu bey sakhta uski aankhein band hone lagein , gahak bhi jaise aaj naaraz sa hai ?yeh sawal dil  mai utra hi tha k khud hi se jawab aaya kay mumkin hai mausam ki wajah se halat aise hein.kuch der khara wo yunhi khud se sawal o jawab kerta raha achanak uski zuban aur halaq sookhne lagey pani ki talab usay satane lagi tu wo aik bar phir dukaan kay ander gya glass cooler ki toonti se lagaya tu uska  bahao tez na paa kay samajh gya k mausam ki wajah se cooler aaj jaldi hi khatam ho gya .Glass ko neeche rakhte huye aik hath se toonti ka button jabkay doosre e cooler ko aik taraf jhuka kay wo glass bharne laga , 2 glass isi mushaqat se peene kay baad wo kuch taza dum hua .
       Asman ab abar e alood ho chuka tha aur aasmani roshni bhi kuch tham si gyi thi lekin habs ka aalam kuch mukhtalif na tha "YA ALLAH apne gunahgar bandoon pey rehmat ki barish nazil farma" hontoon ko harkat dete huye usne parwardigaar se iltijaah ki .Jaib mai rakha uska mobile bajne laga .mobile utha k wo kuch der muskura kay baat kerta raha yeh uski beti ka phone tha jo baap se aam(mango) khanay ki farmaish ker rahi thi wo haami tu bhar chuka tha lekin is baat se afsurda tha k gaahak ney subha ki shakal nahi dikhayi aur aisa mausam sir pay  maathay pey parne wali salwatein uski pareshani waazhya kar rahi thein wo inho khiyaloon mai gum tha k aaj ghar aam kaise ley jaye jayein kay achanak zor daaar  badal garja bijli ki chamak ney aasman roshan ker dia aur aasmaan meena barasne laga tez hawa k sath moti moti boondein zameen se takraane lagein usne man hi man khuda ka shukar aada kia aur hath aagay barha kay apni hatheli per bondein mehsoos karne laga 
        Garmi ka zor toot chuka tha lekin ghar aam kaise ley jaye jayein yeh fikar usay halkaan kar rahi thi barish ka silsila kabhi tez kabhi halka , par chalta raha isi mai 6 baj chuke thay aur aas paas ki dukano kay shutter girne ki awazein aanay lagein.Market apne mukararah wakt pey band ho rahi thi par is ney kuch der aur bethne ka faisla kia barish kuch der ko ruki tu sahi par dobara yehi silsila shuru ho gya isi mai raat kay 8 baj chuke they  aasman siyah ho chuka tha aur door door dekhne se bhi koi dukaan khuli nazar na aa rahi thi bil aakhir usne barish ka bahana bana kay aam na lejane ka faisla kia aur ahista ahista jhukay shaanoo kay sath dukaan band karne ki tayarian karne laga.
      Aik shaks jo goya koi rah geer tha barish se khud ko bachaata bachaata dora chala aaya aur bila ijazat iski dukaan mai ghus gya rah geer ne maazrat ki aur kuch der yahan qayaam karna chaha .Usne mokay ko ghaneemat aur khuda ki masleyhat jana aur kuch der aur dukaan kholay rakhne ka faisla kiya .raat kay saarhay no ( 9:30) baj chuke they aur barish mukamal taur pe ruk chuki thi rah geer nay ijazat talb karte huye uska shukria aada kia  , abhi wo murha hi tha kay achanak uske mobile ki ghanti baji aanay wala fone uski bewi ka tha jo cheekh cheekh kay usay bata rahi thi kay aaj phir barish kay baad poora ghar keeray , makooron aur patangoo se bhar gya hai aaj kataan keeray maar duwa na bhooley ,mobile band karte huye rah geer mura aur counter pe rakhi aik bottle pey likhi tafseelat parhne laga ,tasali paa kar rahgeer ney chaar botloon kay paise usay thamaye aur botloon ka thela utha kay chalta bana .
       Dukan band kar kay wo tezi say kadam barhata hoya phal faroshon kay ilaqay ki taraf chal para. jald hi aamoo se bhara thela uske hath mai tha barish kay baad peda honay wali thandi hawa usay bey tahasha raahat baksh rahi thi .abkay  uske chehre pey aik maani khaiz muskurahat thi...Yakeenan usay uske sabar ka phal mil chuka tha.

Shabaab

zer-e-lub muskurane ko bhi shabab kehtey hein

jo bikhar jaye toot kay us haqeeqat ko bhi khawab kehte hein

falak se toota ik taara aur zameen pey aa gira

hum tootay huye taaron ko bhi mahtaab kehte hein

tere honey se mehakti rahi yeh zindagi faqat

aur hijraan mai mautar honay ko bhi sairaab kehte hein

meri bey ikhtiyaar si udasi na samajh saka koi

har dum rehta hoon muskurata kuch aisa mere ehbaab kehte hein