Ikhlaq Aik Qarz

Dunya ki har zuban apne parhne aur bolne waloon kay liye khoobsurat hoti hai aur in khoobsurat zubano mai buhat se khoobsurat ilfaaz hote hein jo haqeeqatan insan k qalb pe asar rakhte hein, misal kay taur pey hum urdu bolne waley MAA , KHUDA , RASOOL aur beyshumar aise ilfaz hume taskeen pohanchate hein, inhi ilfaaz kay jhurmat mai aik aisa lafz maujood hai jo bolne aur sunne mai tu khoobsurat lagta hai lekin is kay mafhoom ko samajhne aur bil-khasoos is par amal karne mai hum buhat peeche reh chuke hein lafz hai "KHUSH IKHLAQI"

       Is mazmoon ko likhne se kabl (before) maine apne ehbaab say la-shaoori taur par is lafz khush ikhlaqi par mukaalma(dialouge) kia , nateeja manfi raha ,un ka kehna shayad unki danish kay aitbar se durust ho kay bhaiya khush ikhlaqi kahan se layein maujooda haalat apke samne hein intehai zaroori cheezoon ki qilat hai aur jo muyasar hein unke daam humari dastaras se bahir hain, raaton ki neend power short fall ki nazar ho chuki hai , pani is qader aloodah hai kay peena sirf majboori ka naam hai yahan tak k humare apne wasail ki pedawaar GAS b hume mukamal taur pe muyasar nahi.security ka haal yeh hai k subha ghar se niklein tu raat ghar jane ki umeed baqi nahi tu in sab masail mai khush ikhlaqi ka tasawur b kaise peda kar saktey hein

      Chaliye maan lete hein inka kehna durust hai , ab kuch lamhay kay liye apko maazi mai liye chalte hein yehi koi choda soo(1400) saal peeche , sarkaar e do aalam (S A W) arab zameen pe peda huye , inteha ki garam zameen sehraaon aur registaano ki zameen paani bhi aise milta aur taqseem hota jaise aaj k zamane mai zakaat ka nizaam hai , sir pey deen kay firoogh ki zimedari, bhook zindagi ka hisa phir bhi zubaan aur nazroon mai taazeem har shaks kay liye taazeem aur zuban ki mithaas ka andaza is se kar lijiye ka dushman bhi aapke ikhlaq ki sifaat biyan karte rahe aur bohatoon ney tu sirf ikhlaq se mutasir ho kay kalma parha.kya ikhlaq ki is se barhi misaal tareekh kay panoo mai kahin maujood hai ?yakeenan nahi .tu kya hum itna gawara nahi kar saktey kay jis kay naam ka kalma parh rahe hein jo wahid hasti humare liye baais-s-nijaat hai uski is sunehri sunnat pey amal kar sakein

        Buhat sochne aur samajhne kay baad bil-aakhir mai is sawal ka jawab hasil karne mai kaamyab ho hi gya k aakhir ACHA IKHLAQ hai kya ? tu janab mere nazariye(perspective) mai acha ikhlaq aik qarz hai .har umer , har nasal , har tabkay kay insan kay sir pey ikhlaq ka qarz hai aur shayad hi dunya mai koi aisa shaks ho jo ikhlaq ka makrooz na ho aur mazay ki baat yeh wahid aisa qarz hoga jiski sood samait adaigi par bhi mamanat nahi , lamhay bhar ko agar is zaawiye se socha jaye kay zindagi ka wakt buhat thora hai buhat kam hai aur sir pey buhat bara karz hai tu shayad iski adaigi mai asani peda ho sakay aur jo log khuda na khuwaasta is qarz ko bin adaa kiye hi rukhsat ho liye unkey liye is qarz ki adaigi aur bhi sakht ho jaati hai , jo unki naslooon ko bhugatni parti hai , ache ikhlaq k hawale ibn-e-adam sirf apne qaul-e-fael ka zimedar nahi bulkay apni poori nasal ka zimedaar hota hai.

       Kuch baat agar zaroorat ki kar lein tu zaroorat ikhlaq kay nikhaar ki hai jaise hum kisi taqreeb(party) mai jane se pehle khud ko nikhaarte sunwaarte hein aise hi agar thori si koshish ikhlaq kay surkhi poder ki ki jaye tu dunya aur aakhrat dono ki kamyabi humara naseeb ban sakti hai .Rang , nasal , zaat , dolat in sab cheezoon se paray reh kay ikhlaq ko acha banane ki koshish kijiye aur na sirf is amal ko apni zaat tak rakhein buke auroon ko bhi iski talqeen karein .ALLAH TAALAH apko is amal pe ba-khoobi nibhaane ki taufeeq ata farmaye AMEEN ........